Lokal nga kagamhanan sa Cagayan de Oro, padayong nanawagan sa dugang volunteers alang sa Bayanihan, Bakunahan

Padayong nanawagan karon ang lokal nga kagamhanan sa Cagayan de Oro alang sa dugang volunteers sama sa mga nurses, doctors ug nursing assistants nga makatabang alang sa himoong CdO Bayanihan, Bakunahan.

Kini tungod kay naa sa 66-mil ang target sa syudad nga mabakunahan sa National Vaccination Days gikan Nobyembre 29 hangtud Disyembre uno ning tuiga.

Matud ni Antonio Resma Jr., vice chairperson sa CDO Disiplina Muna Advocacy Team ug focal person sa CDO Bayanihan, Bakunahan nga 23 ka vaccination sites ang buksan ug naa sa tres mil ka indibidwal ang maglangkob sa vaccination team.


Mapasalamaton usab si Resma sa mga nitabang alang sa dugang human resource, logistic support ug uban pa kay pinaagi niini nakita ang bayanihan spirit.

Nangayo usab og tabang ang lokal nga kagamhanan sa katawhan nga unta suportahan ang CdO Bayanihan, Bakunahan aron dili masayang ang sakrispisyo nga gihatag sa mga volunteers.

Gipahinumduman usab ni Resma ang tanang magpabakuna nga nag-edad 18 anyos pataas sa pagdala sa ilang ID ug medical clearance sa mga dunay comorbidity.

Samtang sa mga 12 anyos hangtud 17 anyos gikinahanglan ang ilang birth certificate, ubanan sa ginikanan ug kung guardian ang mouban kinahanglan magdala sa authorization letter gikan sa ginikanan ug ID.

Facebook Comments