Lezo, Aklan – Tugbang rong baeay ag sunog man rong lola matapos nga magtuhaw rong sunog kahapon it mga pasado alas dose rong aga-aga sa Sitio Ilaya, Brgy. Ibao, Lezo, Aklan.
Nakilaea rong lola nga si Bertela Crispino Laureano, 69-anyos ag residente man it nasambit nga lugar.
Base sa panugiron ni Felomino Laureano Jr., gumankon it biktima nga kaina nga halin imaw sa tabok nagapauli hay napan-uhan nana nga may naga daba-daba nga kaeayo. Insigida imaw nga nagpangayo bulig sa anang mga igmanghod ag igkamporan. Pag-abot na sa lugar ag pagkakita nga baeay it anang tiya ro nasunog hay dali-dali ra imaw nga nagbuoe tubi sa bomba ag gin binasya pero uwa gid matabangi.
Gin inusoy pa nanda ro andang tiya pero ko ulihi nakita nga kibahan man imaw sa baeay nana nga nasunog ag bungo eon lang ro nahabilin.
Sa dugang nga panaysayon, nakipag angotan man it RMN Kalibo si Rosalie Laureano sambilog pa gid sa mga gumankon it biktima nga rayang andang tiya hay solohanon ay uwa man it asawa, halin raya sa Metro Manila ag pag uli nana iya hay ginhambaean imaw ni Rosalie ngara nga kanda lang mag-impon ay uwa ngani imaw it kaibahan ugaling indi mat-a ay uwa naila it masangang rason nga nagseparar imaw.
Ro baeay it biktima hay himo sa light materials ag may distansya sa baeay ko anang mga gumankon rason nga uwa ta eagi raya mapan-uhi.
Gindudahan man ni Rosalie nga basi nag lingas it kaeayo ro anang tiya ukon nag gamit it posporo ag uwa napan-uhi nga umapok raya sa mga li-ay nga naka tambak sa idaeom it baeay ko biktima rason nga nagmakot ag madasig nga nag eapta bangud sa mabaskog pa hangin kabii.
Nasayuran nga mga uwa man it linya it kuryente ro baeay ko biktima.
Sa makaron hay padayon man ro ginahimo nga imbestigasyon it Bureau of Fire Numancia angot sa nasambit nga insidente.
