Caloocan City – Patay ang isang lola na tindera nang masagasaan ng isang SUV matapos na bumaba mula sa sinakyang pampasaherong jeep sa Caloocan City.
Kinilala ang biktima na si Natividad Rapal habang sumuko naman ang driver na si Carlo Lim.
Sa kuha ng CCTV, nakita si Rapal nang bumaba ng jeep sa harap ng Sto. Niño Church sa Phase 1, Barangay Bagong Silang.
Pagbaba niya sa jeep, yumuko ang biktima para damputin ang mga supot na nilalagyan ng kaniyang paninda nang biglang umarangkada ang kasunod na SUV at pumailalim ang matanda.
Kinuha naman ng driver ng SUV ang biktima at dinala sa ospital pero binawian na ito ng buhay.
Paliwanag ni Lim, hindi niya nakita ang matanda dahil sa pagyuko nito nang kunin ang mga dalang gamit.
Humingi rin ng paumanhin si Lim sa pamilya ng biktima at nangakong tutulong sa pagpapalibing sa matanda.
