Davao City – Dili husto ang pasangil sa driver ngadto sa batan-ong lalaki kinsa giingong miilog sa iyang manobela hinungdan sa nahitabong pagkahulog sa Philtranco bus didto sa tulay sa Tanuan Leyte alas 11:45 sa gabii kaniadtong adlaw’ng Martes.
Kini maoy giingon ni Anastacia Simbajon apuhan ni Wendel Simbajon, 15 anyos, taga-Brgy. Dumoy, Toril ning syudad, kinsa usa sa tulo ka mga namatay sa maong aksidente human adunay mga istorya nga migula nga nakig-ilog ang iyang apo sa manubela sa driver sa bus nga si Edgardo Legaspi atol sa ekslusibong interbyu sa DXDC News Team kaniya.
”Ang sakit lang namo nga ang balita kay (ginakwestiyon) nganong nangilog og manubela si Wendel ug gawas pa anaa dili man siya driver, dili man siya nag-antigo sa pag-drive,” sumala niini.
Sumala niini nga palusot lamang kini sa maong driver aron dili manubag sa maong panghitabo.
Matud pa nga gikan sa Pampanga ang pamilya niini nga mitambong og reunion ug pauli na unta aron i-enroll si Wendell.
Unang bersiyon sa istorya mao nga nakatulog ang maong driver apan luyo niini nagapadayon ang imbestigasyon sa mga awtoridad sa Tanuan.
Gani karon ginaatiman na sa inahan ug amahan ang patay’ng lawas sa biktima aron mahatod dinhi sa Davao apan adunay panawagan si Anastacia ngadto sa Philtranco.
“Mauli lang unta diri si Wendel Simbajon unya ilaha pod unta masagot gikan sa sugod hangtod sa lubong kay wala man pod mi kwarta gud,” saysay niini.
RadyoMaN Jason Amisola
