Patay ang usa ka 85-anyos nga lola ug PWD niini nga apo, human napaig sa insidente sa sunog, sa brgy. Canjulao, dakbayan sa Lapu-lapu karong hapon. Giila ang mga biktima nga silang Aurea Jumao-as, 85-anyos ug Jean Ycong, 14-anyos, kinsa dunay kakulian sa pangisip. Suma ni Edna Jumao-as, anak sa namatay nga lola, nga sa dihang niulbo ang sunog, anaa ra siya sa gawas nga bahin sa ilang pinuy-anan diin ang iyang mga silingan maoy nipahibawo kaniya nga nasunog na ang ilang panimalay. Dugang niini nga sa 2nd floor sa ilang panimalay nagsugod ang sunog ug tungod sa katiguwang, maglisod na sa paglakaw ang iyang inahan, samtang dunay kakulian sa pangisip ang apo niini.
Suway nga nangayo ug tabang si Edna sa iyang mga silingan, apan way nakatabang kaniya sanglit, nanarbaho man ang ubang sakop sa ilang pamilya. Gawas niini, miabot usab sa 16 ka mga panimalay ang naugdaw sa sunog samtang padayon ang gihimong imbestigasyon kalabot sa danyos ug hinungdan sa sunog. Apan ang kabomberohan, nagtuo nga faulty electrical wiring maoy hinungdan sa sunog, basi sa resulta sa ilang inisyal nga imbestigasyon.
