Lolo milugos unay sa apo lisod dakpon sa kapulisan kon wa’y Orden de Arresto gikan sa Korte

Davao City- Sangko sa langit ang kasuko nga gibati karon sa pamilya batok sa lolo nga mi-unay og lugos sa giilang apo nga usa ka 11 anyos nga babaye kinsa pulos mga residente sa Barangay Tambobong, Baguio District ning siyudad.

Dili mapasaylo ni Alyas Gaga, inahan sa biktima, ang suspek nga ama-ama nga giilang si Alyas Lando, 46 anyos sa gihimong paglugos niini sa dalagita.

Nanganti usab ang lola sa biktima kinsa misis sa suspek nga iya gayod kini ipaslak sa prisohan gumikan sa pagguba sa pagkababaye sa biktima.

Gikanayon ni Barangay Kapitan Exequil Salandao nga niadtong adlaw’ng Domingo, misekreto og duol kaniya ang lolo sa laing partido ug nagpahiba -wo nga gilugos ang iyang apo sa giilang lolo niini hinungdan wa maglangay ang Kapitan sa pagdala kanila ngadto sa Baguio Police Station.

Sumala kang Baguio PNP Chief of Police Major Mark Lester Jalon nga base sa ilang imbistigasyon, gikan pa sa edad sa 9 anyos gisugdan og hilabot ug hangtud sa pagtungtong sa 11, maong gipailawom sa medico legal ang biktima kon duna ba’y penetration o wala nga gibuhat ang suspek sa kinatawo sa biktima.

Human nasayran nga miduol na sa Baguio PNP ang kabanay abtik miiktad si Alyas Lando.

Matod kang Major Jalon, maglisod na sila og dakop sa suspek kay milampas na sa gitagal nga panahon aron unta madampan ang suspek.

Sigun ni Jalon, nga karong adlawa iduso ang kaso nga acts of lasciviousness o dili ba kaha lugos subay kini sa palisiya sa Regular Filing, ug kon may Orden De Arresto gikan sa Korte diha dayon maglusad og manhunt operation.

RadyoMaN Joel Viray