Davao City – Bisan tuod walay nakit-ang foul play ang kapulisan sa Buhangin sa kamatayon sa usa ka lolo apan ipailawom pa gihapon sa otopsiya ang patay’ng lawas niini aron masuta ang hinungdan sa kamatayon sa biktima.
Nasayran nga naghambin og balatian ang maong lolo nga si Mario Ruiz, kapin 60 anyos, ug nagpuyo sa Cabantian apan naayo na kini ug padayon nagtumar og maintenance nga tambal.
Wala na usab gikunsidera sa kapulisan ang anggulo nga pagpangawat sanglit kumpleto ang iyang mga gamit ug salapi sulod sa balay sa biktima.
Nag-inusira nagpuyo sa balay ang naasoy nga lolo maong walay nakatabang niini sa dihang nag-ungaw kini sa kamatayon.
Usa ka Vevencio Pepito ang misusi sa balay ni Mario ug mao na lama’y iyang naabtan nga nagbuy-od na ug wala nay kinabuhi ang nasangpit nga biktima alas-6:40 kagabii.
Ang patay’ng lawas sa biktima gidala na sa punerarya diin himoon ang proseso sa gikatakdang otopsiya.
RadyoMaN Joel Viray
