Davao City – Parehong midangop sa Sasa PNP ang duha ka pamilya aron matabangan sila sa pagpangita sa ilang mga minahal sa kinabuhi human nga wala na makabalik sa ilang mga pinuy-anan.
Unang nagpatala sa Buhangin PNP kining usa ka Cecilio Recohermoso, 48 anyos, nagpuyo sa Buhangin ning siyudad.
Matud ni Cecilio nga milakaw gikan sa ilang pinuy-anan ang iyang amahan nga si George Recohermoso, 82 anyos, alas 3:00 sa kahaponon sa miaging adlaw apan hangtud karon pa gyod naka-uli.
Nasayran nga naghambin og sakit nga alzheimer ang maong lolo nga posibling maoy hinungdan nga wala na kini makatuod og uli.
Laing usa ka Jenny Gonzaga, 27 anyos, negosyante nga taga Agusan del Sur ang midangop sa presinto singko aron ipatala ang pagkawala sa iyang iyaan nga si Jeniffer Lourdes Havey, 42 anyos.
Suma ni Jenny nga misibat sa ospital sa may Bajada ning siyudad ang iyang iyaan alas-5:00 sa buntag ug hangtud karon wala na higkita.
Nagbaton og sakit sa pangisip ang maong ginang ug nagpailawom kini og medikasyon sa ospital.
