Mga KASAMA, ini ang sitwasyon sang mga balay nga ginpatindog sang National Housing Authority nga nag-umpisa sang 2012 kag tapuson kon tani sang tuig 2013 apang asta subong wala sa gihapon mahuman.
Suno kay Punong Barangay Marlou Lobaton sang Brgy. Cruz, Barotac Nuevo, Iloilo indi na subong makita ang HG-3 Construction nga amu ang contractor sang proyekto kag ginbilin ang trabaho nga wala matapos.
Base sa litrato nga ginpadala sa RMN Iloilo, nagapakita nga indi pa sarang maistaran ang mga balay bangud kulang ini sa mga masunod; wala sang grill ang bintana kag ang iban nga balay wala pa gid sang bintana kag pwertahan, wala sang inodoro, wala sang linya sang kuryente kag ang masubo wala sang source sang tubig.
Pahayag ni Kap Lobaton, sa kapin isa ka libo ka mga unit sang balay, mga 15 pa gid lamang ka pamilya sang pulis kag soldado ang naga-istar tungod kulang ini sa facilities kag amenities.
Nagareklamo man ang pumuluyo sa barangay bangud nagkalugaba ang dalan samtang ginahimu ang proyekto kag pinabay-an lamang ini sang contractor.
Nahibaluan, ang National Housing Authority ang nagpatindog sang balay sa nasambit nga lugar nga may pondo nga 4 ka billion ka pesos para sa miembro sang AFP, PNP, BOR kag BJMP.
