Arestado ang mag-amay nga Arturo Balume Sr. alias Master Pedic kag Arturo Balume Jr. alias Turing sa Poblacion Hinobaan Negros Occidental mga alas 5:30 kahapon sang hapon.
Naaresto ang mag-amay nga Balume sang gintingub nga puwersa sang Iloilo Police Provincial Office (IPPO), Regional Intelligence Division (RID) kag Negros Occidental Provincial Police Office (NOPPO).
Ginpahayag ni Supt. Julius Balano, Chief sang Regional Intelligence Division nga kapin sa tatlo ka semana nila nga gin-monitor ang mag-amay nga Balume matapos makakuha sang impormasyon nga didto ang mga ini sa banwa sang Hinobaan.
Suno kay Balano nga may tracker team nga nagatutok sa mga high value targets sa rehiyon kon sa diin kalakip ang mga Balume.
Nahibaluan nga ang duha ginakabig nga high value target level 3 kag amo ang lider sang Balume drug group lakip na ang mga goons sa quinto distrito.
Narecover sa paghinakop sang mag-amay ang mga armas kag sachets sang ginapatihan shabu.
Ginalauman nga mabuhinan na ang baligya-anay sang ilegal nga druga sa probinsya sang Iloilo ilabi na sa quinto distrito karon nga nadakpan na ang mag-amay nga Balume.
Suno kay Balano nga magluwas nga mabuhinan ang baligya-anay sang druga, ila man ginalauman nga maganubo naman ang kaso sang murder sa probinsya sang Iloilo.
Nahibaluan nga ang mag-amay nga Balume ang naga-engage sa ilegal nga druga kag subong man nagaserbe nga gun for hire.
