Padayon nga ginabulong ang mga pulis sa Iloilo Doctors Hospital nga amu sanday PO1 Raul Stanley, PO1 Jounnaz Labusta,PO1 Nichomer Lachica, PO1 Frank Denolang, PO1 Christian Keneth Senon, PO2 Tax Capaspas, PO1 Rey An Vigo, PO1 Jothan Arrem, matapos naka-agum sang menor nga mga kapilasan.
Ini matapos nabungguan sang delivery truck ang patrol vehicle nga ginasakyan sang mga biktima sa bahin sang Jalandoni kag Ledesma St., Iloilo City kaina sang aga.
Suno naman sa suspek nga ginkilala kay Herman Ellorquez 36 anyos sang Passi City, indi niya hungod ang natabo .
Ginpahayag ni Ellorquez nga pag-abot niya sa intersection sa bahin sang Jalandoni – Ledesma St., City Proper, may nagpondo nga salakyan sa iya wala gani nagderetso siya apang madasig man ang dalagan sang patrol vehicle rason nga nabungguan gid niya ini.
Nahibaluan nga magadeliver kon tani sang ulutanon si Ellorquez apang disgrasya nga nabungguan niya ang patrol vehicle sang Regional Public Safety Batallion (RPSB).
Sa karon yara sa paghinakop sang Police Station 1 si Ellorquez kag nakahanda siya nga atubangon ang konsekwensya sang iya nahimo.
