Davao City – Laumang muulan karong hapon sa Rehiyon XI human nga nakaapekto karon sa Mindanao ang Intertropical Convergence Zone kun ITCZ ug Low Pressure Area kun LPA.
Sa pakighinabi sa DXDC RMN Davao kang Al Lumaan sa Pagasa Davao, gawas sa ITCZ aduna usab Low Pressure Area kun LPA sa may Surigao City nga nakaapekto usab sa panahon sa ubang dapit sa Mindanao diin subay sa lakat sa panahon karong adlawa, ang Rehiyon sa Caraga makasinati sa mapanganuron nga kalangitan inubanan sa kasarangan ngadto nasa kalit nga pagkusog sa ulan kilat ug pagpanalugdog tungod kini sa LPA.
Ang ubang sa dapit sa Mindanao makasinati ug mapanganuron nga kalangitan inubanan sa katag-katag nga pag ulan kilat ug pagpanalugdog tungod kini sa ITCZ.
Adunay kasarangan ngadto nasa kusog nga hangin ug magagikan sa habagatang kasagpang ngadto nasa kasagpang direksyon ug ang kadagatan kasarangan ngadto nasa kusog ang pagbalud.
Hinungdan nga nagpahinumdom ang Pagasa ngadto sa mga ginikanan nga kanunayng padal-un og payong o rain coat ang ilang mga estudyante ilabi na nga nagsugod na karong adlawa ang abli sa klase sa school year 2018-2019.
Hinuon giklaro sa Pagasa nga wala pay opisyal nga pagdeklara sa tag-ulan karong bulan sa Hunyo.
RadyoMaN Renz Barbarona
