Hugot nga gipanghimakak ni Land Transportation Franchising and Regulatory Board kun LTFRB Central Visayas Director Ahmed Cuizon ang mga elgasyon nga gibato ni Sen. Antonio Trillanes IV nga siya ug si Atty. Manases Carpio nanuburno gikan sa Uber Philippines .
Si Atty.Manases Carpio mao ang bana ni Davao City Mayor Sara Duterte-Carpio nga bag-o lang mitambong sa hearing sa Senate Blue Ribbon Committee labot sa gialegar nga kurapsyon sa Bureau of Customs .
Sa iyang facebook page, gipadayag ni Cuizon nga taliwa sa iyang pagka-appointee sa administrasyon kaniadto ni kanhi Presidente Noynoy Aquino, usa siya sa pipila lang ka mga regional director sa LTFRB nga gihatagan og dugang assignment isip acting director sa LTFRB Eastern Visayas sa concurrent capacity niini .
Gipanghimakak sab ni Cuizon ang alegasyon nga nalambigit siya sa bisan unsang corrupt practices sa LTFRB ug Road Board, apan nanghinaot ang maong direktor nga dunay positibong mogawas sa nagpadayong hearing sa Senado .
Nanawagan sab si Cuizon sa publiko nga dili siya hukman basi sa wa’y mga basehanan nga akusasyon .
