TACLOBAN CITY – Nagpahinumdom an Land Transportation and Franchising and Regulatory Board o kun LTFRB ha mga driver ngan operators han Public Utility Vehicle (PUV’s) nga may pinalidad ngan ma-rerevoke an ira franchise kun magpa-umento hira ha pasahe bisan diri aprobado han nasabi nga buhatan. Ini in kasunod han paghataas han presyo han gasoline durot han TRAIN Law.
Sumala kan LTFRB Regional Director Renwick Rutaquio, posible nga mag-umento an pamasahe pero waray pa ini kamanduan tikang ha National Office kabahin han fare adjustment.
Dugang pa han mao nga opisyal nga ha kada utility vehicle in mayda naka-butang nga taripa nga magpapabilin nga asya an susundon han mga driver.
Pahimatngon pa han opisyal, nga kun may mga public utility vehicle nga magpaumento ha gin-susukot nga pamasahe in pwedi mag file hin complaint ha buhatan hiton LTFRB agud ira maaksyunan ngan madakop.
Samtang ha probinsya han Biliran, 15 nga pampasahero nga van ngan bus an gin-dakop han LTFRB mahitungod han overprices ha pamasahe. Duha naman nga bus ngan 3 nga van an na-impound ha mao nga probinsya.
