Davao City – Pursigido ang Land Transportation Franchising and Regulatory Board (LTFRB-XI) sa pag-phase out sa tanang Public Utility Jeepneys (PUJs) panahon ma-implimentar na ang High Priority Bus System (HPBS) dinhi sa Davao City.
Matud ni LTFRB-XI Regional Director Armand Dioso, maglusad kun maghatag og social package benefits ang kagamhanang lokal alang sa sektor sa transportasyon nga maapektohan sa maong programa.
Walay hunong ang konsultasyon ug dayologo nga gipahigayon karon sa City Transport & Traffic and Management Office (CTTMO) ug LTFRB uban sa mga drivers ug mga operators nga maigo sa HPBS program.
Dugang ni Dioso, pipila sa mga asistinsiyang itunol alang sa mga anak sa mga drivers mao ang college scholarships, work training, employment opportunities ug daghan pa nga gihisgutan atol sa serye sa mga konsultasyon ug panagpulong.
Apan dili tanan mi-uyon ug midawat sa social packages nga gitanyag sa kagamhanang lokal kansang tuyo mao nga mahatagan og alternatibo nga panginabuhian ang mga drivers ug mga operators sa PUJ ilawom sa HPBS.
Gidugang ni Dioso nga musugot man o sa dili, ang mga drivers ug mga operators sa PUJ ibalhin gayud ngadto sa bag-ong mode of transportation sa dihang masugdan na sa hingpit ang pagpadagan sa mga bus de pasahero dinhi sa dakbayan.
RadyoMan Joel Viray
