Davao City – Gipanawagan sa Land Transportation Franchising and Regulatory Board (LTFRB) sa mga drivers ug operators nga public utility jeepneys (PUJs) nga sundon ang gipatumang ‘social distancing’ sa mga pasahero aron malikayan ang pagkatag sa Coronavirus Disease 2019 (COVID-19).
Sa interbyu sa DXDC RMN Davao kang Armand Dioso, Regional Director sa LTFRB-XI, gibutyag niini nga ang pagsunod sa maong balaod makatabang sa tanan aron kalikayan ang pakuyanap sa maong seryosong balatian.
“Sa mga operators ug drivers kinahanglan mutuman gyud ta sa social distancing kay kini siya proteksyon gyud ni siya dili lang sa driver but pati sa atong mga pasahero,” saysay ni Dioso.
Samtang, gisugyot usab ni Davao City Mayor Sara Duterte-Carpio atol sa interbyu kaniya sa Davao City Disaster Radio nga butangan og masking tape ang lingkuranan aron magbaton og ilhanan ug matuman gyud ang ‘social distancing’.
Nasayran nga gawas sa LTFRB, istrikto usab nga i-monitor ang pagpatuman sa maong palisiya sa Land Transportation Office (LTO) ug uban pang mga hingtungdang ahensya sa gobyerno.
RadyoMaN Kirby Manzon
