Davao City – Sugdan na sa unang semana sa buwan sa Abril karong tuiga ang kinse ka oras nga seminar sa tanang mokuha og student permit.
Gibutyag ni Land Transportation Office 11 Director Atty.Gomer Dy nga ipatuman sa tibuok nasud ang maong requirement sa tumong nga ma-edukar ang tawo kun maglukat og student permit sa mahitungod sa luwas nga pagmaneho diha sa kadalanan.
Dili sa naandang sistema karon nga sayon ra kaayo makuha sa aplikante ang student permit basta masumite lang ang basic requirements sama sa medical ug birth certificate nga gipangayo sa LTO.
Nasuta nga sagad sa mga nalambigit sa disgrasya sa kadalanan karon kadtong wala muagi og sakto nga seminar ug dali ra nakalukat og student permit nga karon buot nang usabon sa buhatan sa LTO.
“Ang atong mga drivers walay diskarte ba, dapat magbaton siya (driver) og IQ para ma-maintain ang order sa order on the road. Ang pag drive kasi is a continuous right, so dapat ang driver i-prepara ang iyang sariling independent mind unya ang driver nga walay pakialam sa kalsada mao nang kinahanglan sila seminaron pa-usab,” segun ni Dy.
Nasuta nga dili mu-ubos sa usa ka milyon ug dosentos mil ka road crashed ang matala matag tuig sa kali-butan diin kapin onse ka mil niini ang natala sa tibuok tuig dinhi sa pilipinas.
Ang maduguong disgrasya sa kadalanan hatud kini sa dili istrikto nga palisiya ug kakuwang sa saktong seminar labot sa safety driving sa tanang milukat/mulokat og student permit ug driver’s license.
Suma ni Director Dy nga gawas sa kinse ka oras nga seminar sa mulukat og student permit, ang LTO mupatuman usab og re-orientation seminar alang sa mga nagkuha og driver’s license.
Dugang sa opisyal, dako’g tabang ang istrikto nga palisiya sa pagkuha og driver’s license ug pag-obliga sa mga mulukat og student permit sa zero casualty sa biyahe sa mga kadalanan.
RadyoMaN Joel Viray
