Gipatawag sa hawanan sa 26th Sangguniang Panlalawigan si Engr. Virgilio R. Nanol- Chief Land Transportation Officer-Malaybalay District Office.
Lakip nga gihisgutan sa maong session ang nasinati sa kasamtangan sa mga motorista sa kalangay sa pagpahigayon ug mandatory Smoke Belching Test sa dili pa magpa-renew o magparehistro sa mga sakyanan sa Land Transportation Office.
Sa impormasyon nga gibutyag ni Engr. Nanol nga aduna lamang duha ka mga Smoke Belching Testing Center ang nag-operate sa syudad sa Malaybalay nga anaa sa Brgy. Casisang ug Brgy. Aglayan.
Dugang usab ni Nanol, nga gipasira sa Department of Transportation o DOTr ang nag-operate kaniadto nga anaa dapit sa LTO Compound gumikan sa mga violation nga ilang nabuhat. Lakip sa mga violation nga ilang nasupak mao ang pag-edit sa mga hulagway sa sakyanan diin pareho lamang ang hulagway sa nagpahigayon ug Smoke Belching Test ug pagbalhin sa plate number ngadto sa laing sakyanan.
Matud pa ni PCL Ex-Officio Board Member Atty. Oliver Owen Garcia nga dako ang violation nga ilang nasupak gumikan kay mapasakaan kini sa kasong falsification of public documents.
Gibutyag usab ni Engr. Nanol nga malangay gayod ang pagpahigayon sa Smoke Belching Test sa mga sakyanan gumikan kay mokabat lamang sa 32 ka mga Diesel Engines ug 48 ka mga Gasoline Engines ang ma-proseso matag adlaw sa mga Testing Centers.
Hugot usab nga gibutyag ni Engr. Nanol nga ang ilang opisina wala nag-entertain ug mga fixer ug gidasig ang tanan nga mo-dritso sa ilang opisina ug musunod sa hustong proseso.
Gipangutana usab sa mga Board Members ang kabahin sa mga problema sa plate numbers diin sa kasamtangan hinay-hinay na nga girelease sa LTO, penalty sa mga bayronon diin gibutyag sa Malaybalay LTO Chief nga gi-extend ngadto sa 60 ka adlaw nga walay penalty niadtong wala pa ang Mayo 13 ning tuiga gumikan sa COVID-19 ug ang problema sa trambutso sa mga sakyanan nga kinahanglan anaa sa likod ayha kini maka proseso sa Smoke Belching Test gumikan sa bag-ong gipatuman sa DOTr.
Plano usab sa Sangguniang Panlalawigan nga magpasa ug resolusyon ngadto sa DOTr aron ikonsidera ang pagdugang ug Smoke Belching Testing Center sa probinsya aron mapadali ang pagrehistro ug pagrenew sa mga sakyanan.
