Polanco, ZDN- Karong adlawa mao na ang pagpahigayon ug usa ka Office off-site/ mobile operations nga gitawag ug Mass Student Permit Application ang ipahigayon sa LTO-Dipolog sa lungsod sa Polanco
Didto kini pagahimoon sulod mismo sa Polanco Municipal Gymnasium, sugod alas 9 ang takna sa kabuntagon.
Dungan niini, magpahigayon usab ang LTO-Dipolog ug pagpangtudlo sa mga aplikante sa luwas nga pagmaneho, mga tamdanan ug dugang pang kahibalo may kalabutan sa ensaktong paggamit sa kadalanan.
Ang lakang gihimo sa LTO gumikan sa namatikdan, nga kadaghanan sa mga aksidente sa kadalanan, nahitabo dili gumikan sa problema sa makina o sakyanan kundili sa tawhanong sipyat o human error.
Ang Offline/Mobile Operations maoy usa sa mga Programa ni PRRD aron mapaduol sa katawhan ang nanag-unang serbisyo sa gobyerno. Kini usab ang unang higayon nga dunay ipahigayong Offline /Mobile Operations sa rehiyon 9.
Apan gumikan sa problema sa connectivity, mang-apud-apod lamang sila ug Application for Driver’s License (ADL) forms ug flyers para sa mga rekisitos apan ang aplikante mopailalom pa gihapon sa Medical Certification uban sa LTO-9 accredited physicians.
Sa samang higayon, ang vein pictures himoon sa tagsa-tagsa ka aplikante uban ang ilang pirma. Sa higayon, nga ma-evaluate na ang mga bayronon, ibalik ang na-proseso nang aplikasyon, ibalik kini sa Buhatan sa Mayor diin kuhaon sa mga aplikante.
Ang mga intresadong aplikante kinahanglan ug photocopy sa usa niining mosunod nga dokumento – – Birth Certificate, alang sa mga ulitawo o dalaga; Government issued valid I.D. o kaha Marriage Certificate diin adunay nakabutang nga adlawng natawhan sa aplikante.
