LTO nagpahimangno batok sa mga overloading nga sakyanan

Nagpahimangno ang Land Transportation Office kon LTO sa publiko ilabina mga motorist nga bawal ang pagpasakay sa mga sakyanan nga sobra sa gitakdang kapasidad.

Nasayran nga nagpagawas ug memorandum ang nasudnong buhatan sa LTO sa tanang regional directors ug mga traffic enforcing agencies sa Pilipinas nga pakusgan ang pagpatuman sa Section 32 ug 51 Republic Act No. 4136 nga nagkanayon nga ginabawal ang sobra sa numero sa pasahero sa sakyanan ug ang pagpasakay sa likod sa mga truck ug pick-up.

Sa interview sa RMN Malaybalay ngadto kang LTO Malaybalay Chief Engr. Virgilio Nanol, gibutyag niini nga dugay na ang mao nga balaod nga bawal sa mga adunay elf, multicab nga abli ang likod, bonggo, or pick-up na sakyanan, ang pagpasakay ug tawo sa likod tungod kay gidesinyo kini alang lamang sa mga karga ug makonsidera kining overloading.


Gawas niini, matud ni Engr. Nanol nga apil usab sa mao nga kamanduan ang pagbawal sa pagpasakay sa mga motorsiklo nga sobra ang sakay base sa RA 1066 kon Children’s Safety on Motorcycles Act of 2015.

Ang mao nga kamanduan tungod sa sunod-sunod ang mga balita sa disgrasya sa kalsada diin pipila ang nangakalas nga kinabuhi tungod kay delikado ang magsakay sa likod labi na nga wala kini safety gears.

Facebook Comments