Davao City – Nag-unang problema karon sa mga nag-unang kasyudaran kon mga Local Government Units (LGUs) sa nasud ang pupaigong parking areas gumikan sa pagdaghan sa mga pampubliko ug pribadong mga sakyanan nga naggamitan sa nag-unang kadalanan.
Matud ni Land Transportation Office (LTO-XI) Regional Director Gomer Dy, usa kini ka dilemma kon realidad mugna sa kalamboan nga angay natong atubangon una pa man mograbe ang atong sitwasyon pipila ka tuig gikan karon.
Dugang ni Dy nga suportado nila ang mga lakang kun inisyatibo sa LGUs sama sa Davao nga magbutang ug konkretong sistema diha sa mas hapsay nga traffic and transport flow and management.
Kahinumdoman nga nagplano karon ang City Government nga mag-implementar og parking fees sa mga behikulo nga mag-parking daplin sa kalsada ingon man ang pagtukod og parking buildings or facilities aron ka-parkingan sa mga sakyanan.
Matud ni Dy, pabor sila sa proposal nga pabayron og parking fees sulod sa usa ka tuig ang mga tag-iya og sakyanan aron maka-parking kini sa mga gi-designate nga mga kalsada samtang wala pa’y durableng parking facilities nga matukod dinhi sa atong dakbayan.
Rekomendasyon usab ni Dy ngadto sa tanan nga dawaton nga obligasyon sa matag indibidwal ang pagbaton og kaugalingon nga parking areas kon naglaraw nga magbaton og private vehicle aron dili sila makasinati sa tumang kalisud sa pagpangita og parking spaces ilabi na dinhi sa sentrong bahin kon central commercial districts.
Dugang ni Dy nga angay nang tun-an sa City Traffic and Transport Management Office (CTTMO) nga magbuhat na gayud kita og bag-ong palisiya sarang himuong basehan sa pagtuldok sa problema sa nagkayuri nga parking spaces dinhi sa atong dakbayan.
RadyoMaN Joel Viray
