Davao City – Gipaniguro ni Land Transportation Office (LTO) Regional Director Gomer Dy nga may mga ginsakpan kining nagkatag sa mga nag-unang kadalanan sa syudad aron maseguro nga walay mga drivers sa mga taxi ug Public Utility Jeepneys kun PUJs mangisnab sa mga pasahero nga mupara ug musakay sa mga public transport units.
Matud ni Dy, partikular iyang gipabutangan og mga sakop mao ang mga terminal, mga pantalan ug airport dinhi sa syudad sa Davao ug sa tibuok rehiyon sa tumong nga walay mga pasaherong ma-isnaban sa mga drivers sa mga pampublikong panakayan.
Giingon ni Dy nga daghan ang nagreklamo sa ilang buhatan nga mga pasahero human sila gi-isnab sa mga drivers sa mga pampulikong sakyanan ug mao kining hinungdan nga nahimugso ug gipakusgan ang ‘Oplan Isnabero’ aron sitahon ang mga drivers nga gapili og ilang mga pasahero diha sa kadalanan.
Gipasabot sa opisyal nga may dakung tulobagon ang mga drivers nga ga-isnab og mga pasahero diin ang tugbang nga silot kanila mao ang pagbakwi sa driver’s license busa karon nga holiday season holiday,hugot ang pahimangno sa director ngadto sa mga drivers nga dili mangisnab ug pasakyon gayud ang mga pasahero nga mamara ngadto kanila.
Gidasig ni Dy ang publiko nga gilayon musumbong ug musang-at og reklamo ngadto sa ilang buhatan kun man ugaling isnabon sila aron ila gilayong maaksyonan ug ma-disiplina ang mga drivers nga nagpabadlong diha sa mga kadalanan.
RadyoMaN Joel Viray
