Davao City- Mag-agad una sa evaluation sa Central Office sa Land Transportation Office kung ipatuman ba usab kini sa mga buhatang rehiyonal sa entero nasud Pilipinas.
Kini maoy gipamahayag ni LTO XI Regional Director Atty. Gomer Dy sa interview sa DXDC RMN Davao.
Matud ni Dy kung molampos ang bag-ong sistema base sa kasinatian sa LTO central office, mosunod gilayon ang ubang areas sama sa atong dapit gamit ang eksperyensiya sa kaulohan.
Karong adlawa sugdan na og pag-release sa LTO didto sa Quezon City ang mga driver’s license cards nga adunay 5-year validity.
Gipasabot ni Dy nga dili dayon mahimo ang pag-release sa maong driver’s license dinhi sa Davao Region gumikan kay seguruhon usa nga wala nay mamahimong technical problem sa sistema sa paghimo sa maong card.
“Maghulat na pod ta para sa another date of testing aron ma-successful siya kay lisod mana natong iimplementa unya daghan diay kaayong technical problems samot atong labad sa ulo ana” matud ni Dy.
Segun pa sa opisyal nga wala makasunod sa gi-require nga internet speed ang duha ka district office sa LTO XI, ang Digos City ug Island Garden City of Samal atol sa paginspeksyon sa kumitiba gikan sa central office.
Magkinahanglan og kusog nga internet ang machine aron sa pag-imprinta sa bag-ong mga license cards og malikayan nga kini mokagar.
“Nag-experimental pa man karon sa NCR kung duna pa bay technical problems nga ma-encounter kung iimplement ba nato ang 5-year validity because we’ll be using internet driven machine para pag-print sa card” sumala ni Dy.
Gibutyag ni Dy nga as of August 22, 2017 adunay 138,000 ka mga drivers na ang ni-apply alang sa non- professional, professional drivers license ug nag-renew og lisensya aron modawat og lima ka tuig nga valid license cards human nag-cut-off alang sa 3-year validity sa driver’s license niadtong November 2, 2016.
Dugang pa niini nga una maka-apply ang usa ka driver alang sa lima ka tuig nga validity sa lisensya, lantawon una ang rekord niini kung kapila na kini nadakpan ug kung wala kiniy rekord adunay discount nga madawat ang driver diha sa license fee.
Kasamang Aimee Guinita
