TACLOBAN CITY – Nagsarabot na an Tacloban City Government, Dept. of Interior and Local Government ngan Tacloban City Police Office han lugar kun diin pwede an fireworks display ngan pagpabuto han pinili nga firecrackers.
Sumala kan PCInsp. Rex Cantillep, tagapagyakan han Tacloban PNP, ha Balyuan, Magsaysay Boulevard la ini hiimuon ngan diri ha iba nga kakalsadahan han syudad han Tacloban.
Ha Balyuan la gintutugot an pagpabuto han mga masunod nga firecrackers, an babay rocket, bawang, el diablo, judas belt, paper craps, full of spain, sky rocket, kwetis, ngan small trayanggulo tungod kay magkusog man ini nga mga pabuto.
An gintutugot naman nga pabuto ha gawas han panimalay an mga gugti la nga pabuto sugad han butterfly, fountain, jumbo regular special, mabuhay, boses, roman candles, ngan sparkle.
Kasagaran nga ginpapalit han mga kabataan an pabuto nga piccolo nga mahugot nga igindidiri han mga otoridad.
Pahimatngon han mga gintutuinan nga sumunod han ira mga abiso para waray disgrasya yana nga bag-o nga tuig.
