Davao City – Gidasig sa 10th Infantry Division Philippine Army ang mga kaigsuonang Indigenous People (IPs) sa Talagingod, Davao del Norte nga dili mosangko ngadto sa gikataho nga pagpangayaw human nga napatay ang Lumad leader nga si Datu Banadjao Mampaundag ug anak nga si Jhonard Mampaundag.
Gipasabot ni 10th ID spokesperson Capt. Jerry Lamosao, ang tinuod nga isyu dinhi mao ang pagkutlo sa mga kinabuhi sa mga biktima nga hinimuan sa NPA ug dili kinahanglan nga mahitabo ang pagpangayaw o pagpanimalos batok sa ila ra pod mga ka-tribu kinsa na-recruit sa mga NPA.
“Atong gina-encourage ang mga tao not to resort to revenge. Atong gi-encourage sila nga mag-resort kita sa mas maayong pamaagi sa pagsulbad ug paghatag og hustisya. Naa ang atong PNP, kasundaluhan ug atong mga government agencies nga maoy muasikaso niini aron sa ingon matagaan nato’g hustisya ang kamatayon sa duha ka lumad,” matud ni Lamosao.
Gipasalig ni Lamosao nga panalipdan nila ang mga sibilyan kung ugali mang mahitabo ang gilaraw nga pagpangayaw sa mga IPs didto sa Talaingod.
Sa pikas bahin nanawagan si National Commission on Indigenous People (NCIP) Provincial Head Emmanuel Caccal sa mga lumads nga iresolba ang ilang mga isyu sa ilang mga katribu sa hapsay ug malinanawong pamaagi.
“Kabahin na sa ilaha pero kami nagahangyo sa ilaha kay once nga adunay mahitabong pangayaw, magkagubot ug daghang madamay. Dili mani solbad ang ginaingon natong pagpatay sa lain na pod kay dili na hinuon kini mahuman,” sumala ni Caccal.
Kahinumduman gibutyag ni Lumansad B. Sibogan ang Presiding officer sa Municipal Council of Elders sa Talaingod atol sa AFP PNP Press conference nga aduna silay himuong pagpangayaw batok ngadto sa ilang mga katribu kinsa mga sakop sa NPA nga gisuspetsahang maoy nagpatay sa magamahang Mampaundag.
RadyoMaN Aimee Guinita
