Davao City – Dili madawat sa Luna Legal Resource Center for Women and Children ang katarungan nga tungod kay walay sexual intercourse nahitabo, pasagdan na lamang nga mabaligya ang dungog sa babaye ug sa kabataan diha sa webcam.
Sumala ni Luna Center Focal Person Atlanta Yap, ang pag-perform atubangan sa web cam ug makita sa mga langyaw’ng customers ang lawas sa mga bababye ug sa kabataan matawag nang pornograpiya.
Dili katarongan nga tungod kay pribadong parte lang sa lawas ang makita sa mga langyaw’ng customer ug walay pakighilawas tali kanila, tugtan na lamang nga magpadayon ang pornograpiya.
Ang pornograpiya usaka hulagway sa pagpamentaha ug pagpahimulos sa kawad-on ug kahuyang sa mga babaye ug sa mga kabataan pinaagi sa pagbugaw kanila ngadto sa mga langyaw’ng customers.
Dili makabugti ang salapi nga ibayad sa mga langyaw ngadto sa nagpasiugda sa pornograpiya sa pagbakod sa dignidad ug dungog sa mga babaye ug pagpabalik sa naguba nga moralidad sa kabataan.
Matud ni Yap, ang mga bata nga gamiton sa pornograpiya makasinati og dili ti-aw nga trauma tungod nga sila giabuso sa mga tawo nga walay pagbati ug wala maghunahuna sa ilang kaugmaon.
Giingon ni Yap nga sa nahitabo sa mga babaye ug kabataan nga sila gipahubo atubangan sa webcam ug gikalingawan og tan-aw ang pribadong parte, butang kini nga makapaalarma sa katilingban.
Gipalanog ni Yap ang iyang panawagan ngadto sa kagamhanan nga mas pakusgan pa ang implementasyon sa mga pertinenteng balaud batok sa mga kriminal sa pornograpiya ug human trafficking aron wala nay mabiktima pa.
Pagdasig pa sa focal person ngadto sa mga ginikanan nga dili gayud tugtan ang ilang mga anak nga mag-inusara og gamit sa cellphone aron dili madala sa mga bugaw diha sa paghimo og malaw-ay bugti ang tinaginting sa bayad.
RadyoMaN Joel Viray
