Manukan, ZDN-Gipasabot karon sa kapulisan sa lungsod sa Manukan ngadto sa mga residente kalabot sa gikagubtan ug gikabalak-an sa mga katawhan sa Brgy. Pangandao, Manukan, kalabot sa gikatahong adunay gidagit nga brgy. Tanod niadtong adlawng myerkules.
Kung kahinumduman linawas nga mitaho sa buhatan sa kapulisan si konsehal Rey Falconite nga matod pa, gidagit ang tanod nga si Gumilok sa mga armadong lalaki.
Dali kining girespondehan sa kapulisan sa Manukan uban sa 2nd platoon sa 97IB, PA, aron sutaon kun may nahitabong pagdagit sa nahisgutan nga barangay.
Didto nasayran nga dili tinuod ang naunang taho,kun dili ang gikaingon nga mga armado lalaki, sakop kadto sa Zamboanga del Norte Provincial Mobile Force Company, naghimo ug Joint Internal Security Operation (ISO) ug miadto kini sa panimalay ni Brgy. Tanod Gumilok para mangayo assistance isip guide.
Apan ang anak niini nga lalaki, nahadlok sa dihang nakita niya nga gidala sa mga taga Zamboanga del Norte Provincial Mobile Force Company ug 97IB ang iyang amahan, hinungdan nga mikalagiw kini palayo padulong sa iyang eskwelahan, ug didto misumbong kini sa iyang magtutudlo nga matod pa adunay mga armado sa ilaha, ug gidala ang iyang amahan.
Dali usab nga mitaho ang magtutudlo sa barangay ngadto kang konsehal Falconite ug si konsehal na usab ang miabot sa buhatan sa kapulisan.
Tungod sa mga palsipikado nga impormasyon, dali kining mikatag sa mga text ug diha usab sa mga social media sama sa Facebook, nga gikaalarma usab sa mga katawhan sa mao nga lungsod bisan paman sa mga lagyong lugar.
Hinuon, gisiguro usab sa kapulisan sa Manukan sa pagpanguna sa hepe nga si PCapt. Benjamin Napigpit nga kanunay silang alerto aron mapatunhay ang kahapsay ug kalinaw uban usab sa pag abag sa kasundaluhan nga anaa nahimutang sa may Brgy Punta Blanca, Manukan.
Sa katapusan, gipasigarbo sa kapulisan nga hapsay ug malinawon ang tibuok dapit sa lungsod sa Manukan.
