Molave, Zamboanga del Sur – Nagpatuman ug bag-ong schedule sa curfew hours ang lungsod sa Molave niining gipailalom na ang probinsya sa Modified General Community Quarantine (GCQ) sugod kagahapong adlawa.
Sa mando ehekutibo nga gipagawas ug gipermahan ni Molave Mayor Cyril Reo Glepa, alas 9 sa gabie hangtud sa alas 4 sa kadlawon ang curfew hour sa mga establisimento sama sa mga tindahan, bars, kan-anan, massage parlors, videoke bars, internet ug gaming shops sa nasangpit nga lungsod.
Samtang ang mga senior citizen ug sa mga kabataan nga nag-edad ug 20 anyos paubos kinahanglan nga hipos na sa tagsa tagsa ka mga panimalay sugod alas 5 sa hapon hangtud na sa alas 4 sa kadlawon gawas lamang kon adunay emergency.
Gisukip usab sa maong mando ehekutibo nga exempted sa maong kamanduan ang mga health workers, mga opisyales ug empleyado sa gobyerno, mga nagbyahe gumikan sa medical nga rason, mga nagtrabaho sa slaughterhouse ug ang mga nagtrabaho isip provider sa basic services ug public utilities.
Exempted usab sa curfew hour ang mga maghatud ug pagkaon ug mga tambal, mga parmasya, 24/7 nga mga convenience ug grocery stores lakip na ang mga nagabiihan sa byahe paingon sa kasikbit nga dapit, mga mouli sa ilang pinuy-anan ug ang mga nagakinahanglan sa atensyong medical.
Ang mga establisimento nga nag-abli sulod sa curfew hours ug pakyas sa pagtuman sa maong mando ehekutibo posibleng mabawian o mawagtangan sa business permits ug ang mga indibidwal nga magsige pa ug laroy laroy sulod sa lungsod atol sa curfew hour mag-atubang sa tukmang kaso.
