Atol sa SITG Bragas conference kagabii, gibutyag ni Col.Lupas nga padayon pa nilang ginaila ang pagkatawo ni John Doe ug kung taga-asa kini ug ang kasamtangang gitagoan niini sa pagkakaron.
Dugang ni Lupas, dili usab sila mag-undang sa pagpangita sa ombak nga color yellow nga maoy gisakyan sa mga suspek nga silang Dennis Panzan, Kent Lawrence Espinosa, Renato “Empoy” Bayansao ug John Doe dihang ilang na-pick-up sa kanto sa Fausta si Architect Vlanche Marie Bragas pasado 10:00 sa gabii niadtong Mayo 16,2023.
Nasayran, adunay 34 ka unit sa bao-bao nga pareho ra tana’g porma nga gigamit sa mga suspek apan suma ni Lupas nga bisan pa og ilisan og kolor ang ombak kaya gihapon kini mailhan sa mga kapulisan.
Gani adunay nadawat nga inpormasyon ang SITG sa tag-iya sa ombak nga gigamit sa krimen hinoon nagdumili na ang opisyal sa paghatag og dugang detalye niini.
Gikontra usab sa City Director ang pamahayag sa kabanay ni “Empoy” nga dili kini kabalo magmaneho og motor ug nga wala kini driver’s license kay base sa record sa LTO XI adunay motor nga Rossi nakarehistro kang Empoy.
Kahinumdoman, si Empoy gitudlo sa mga testigo nga maoy driver sa ombak dihang misakay si Bragas diin dunay dakong posibilidad nga magkaila ang biktima ug si Empoy sanglit pareho lang sila nga taga-Calinan.
RadyoMan Joel Viray
