Sumala kang Davao City Police Office (DCPO) Spokesperson Police Captain Hazel Tuazon atol sa AFP-PNP Presscon, prayoridad sa ilang buhatan karong summer season ang pagpakgang sa mga krimen ingon man ang gipakugsang monitoring aron malikayan ang disgrasya.
Ug butyag sa opisyal nga ang mas labing ginatutukan karon mao ang mga drowning incidents diin giawhag nila ang mga ginikanan nga bantayan og maayo ang mga anak aron sila layo sa peligro.
“Isa-isahon ang kanto ug dagat. Syempre atong barangay, dili pud permi naa dinha. Ang atoa lang diha, magtinabangay lang specially sa mga ginikanan nga naay mga batang gagmay. Di nila pasagdan nga mangaligo sa dagat nga mao rang usa, walay kauban unya ang mga kauban mga bata rapud. Ang mga ginikanan gyud ang dunay responsibilidad,” pahimangno ni Tuazon.
Kahinumduman nga niadtong April 13, 2024, tulo ka mga bata ang nalumos sa Brgy. Centro, Agdao ug dayong gisundan niadtong April 15, Lunes sa pagkalumos sa usa ka 14 anyos nga lalaki sa Brgy. Dalagdag, Calinan.
Nagpahinumdom si Tuazon ngadto sa publiko nga kanunay magbinantayon ug maminaw sa kung unsa man ang pahimangno sa otoridad alang sa malipayon ug malinawong summer vacation.
RadyoMaN Ivy Parido
