Davao City – Tumong nga mabatukan ang sakit sama sa dengue, malaria ug uban pa gumikan sa hugaw nga palibot, kanunay nang ginalusad sa Brgy. Maa ning syudad ilawom ni Brgy. Captain Cadido ‘Jun’ Canete Jr. ang Oplan Kalinis.
Atol sa interbyu ni RadyoMaN June Duterte sa nagmalampusong STP sa Barangay sa adlaw’ng Sabado, Marso 23, gibutyag ni Brgy. Kagawad Martino Carillo, nangulo sa Committee on Peace and Order, nga matag quarter nang ginabuhat sa barangay missionaries ang maong aktibidad aron magpabiling luwas ang mga residente sa mga sakit.
“Tanan functionaries muhatag og simpatiya sa tanang lugar sa Maa para limpyohon ang kanal para malikay sa sakit sama sa dengue ug malaria ilabi na ngadto sa mga bata,” saysay niini.
Dugang niini nga aduna silay ginalusad nga canal brigade matag Lunes hangtod Biyernes ug mamahimong mohangyo usab ang mga residente ngadto sa barangay council pinaagi sa sulat nga himuon kini sa adlaw’ng Sabado o Domingo.
Samtang gi-awhag ni Brgy. Kagawad Lyndon Banzon, head sa Committee on Health, ang mga residente nga kanunay manglimpyo sa ilang tugkaran subaybsa ilang kampanya nga ‘Tapat ko, Linis ko’.
Sa pikas bahin gikanayon ni Banzon nga gawas hisgutanang panlawas, aktibo usab ang Brgy. Ma-a sa pagpangandam batok kalamidad sama sa kanunay available nga fire trucks ingon man anv baguhay lang napalit nga P1. 8M kantidad nga ambulansiya aron moserbisyo sa mga residente.
Kanunay usab naka-standby ang ilang mga rescuers ilawom sa gitawag nga Brgy. Ma-a CARES kun Community Assistance & Rescue for Emergency Services kinsa muresponde panahon nga adunay kalamidad sa maong barangay.
RadyoMaN Jason Amisola
