Posible nga madula na ang Boracay sa palaabuton.
Ini ang ginpahayag ni DENR region 6 director Jim Sampulna kon padayon ang pag-abuso sa nasambit nga isla.
Ginhatagan pagtamod ni sampulna nga sobra-sobra na ang pag-abuso sa Boracay kon sa diin guba na ang natural sini nga katahum kag ginakabalak-an nga wala na sang turista nga magakadto sa ulihi.
Suno kay DIrector Sampulna nga ini ang ila ginhatag nga report sa Malakanyang kabangdanan nga nagpaandam si Presidente Rodrigo Duterte nga ipasira ang Boracay kon indi masolbar ang environmental problem sa isla sa sulod sang anum ka bulan.
Angut sini, ginpahayag ni Sampulna nga dapat siraduhan sa sulod sang duha ka bulan tubtub isa ka tuig ang isla sang boracay kag indi anay pagpasudlan sang mga turista.
Ini agud ma-restore ang katahum kag katinlo sang nasambit nga isla.
Suno kay sampulna nga kon hatagan siya sang poder, luyag niya nga siraduhan anay ang isla sa mga turista agud mahatagan sang nagakaigo nga panahon agud masolbar ang environmental problem sa Boracay.
