SYUDAD sang Iloilo – Ginkalipay ni Dr. Dorothy Tarol nga isa siya sa napulo (10) ka pasidunggan bilang Metrobank Foundation Outstanding Filipinos subong nga tuig.
Suno kay Dr. Tarol tuman ang iya kalipay nga napilian siya nga padunggan sa madamo nga nagahandum nga makuha ang prestihiyuso nga pagkilala.
Nagatudlo si Dr. Tarol bilang Master Teacher II sa SPED-ISEC (Integrated School for Exceptional Children) kag nagserbe man bilang Guidance Counselor sa nasambit nga eskwelahan.
Apesar may hearing impairment, wala ini nakasablag sa iya sa pagtudlo sa mga kabataan nga may multiple disabilities.
Nangin inspirasyon ini para kay Dr. Tarol agud magsulat sang action research nga “Buddy-Mediated Instruction (BMI)” para maimprobar ang literacy skills sang mga estudyante nga may yara sang hearing impairment.
Nagserbe ini nga benchmark model sang Department of Education Schools Division of Iloilo City kag ginsunod sa kapin 178 ka eskwelahan.
PAGDULA SANG IYA PAMATIN-AN
Gin-ako ni Dr. Tarol nga wala siya ginbata nga indi makabati. Sa interview sang RMN Iloilo, iya ginpahayag nga normal man ang iya pamatin-an sadto.
Nadula lamang ang iya pamatin-an bangod sang allergy.
Aminado si Dr. Tarol nga bangod man sang kaimulon sadto, wala nila nahibaluan nga may allergy siya sa gatas sang baka. Manubo man ang iya immune system kag manubo ang iya immunity sa infection bangod wala siya naka agi breastfeed sang iya ginikanan.
Ini ang rason kon nga-a malapit kay Dr. Tarol ang mga kabataan nga may hearing impairment. Sa subong, magluwas sa mga kabataan nga may hearing impairment nagatudlo man ini sa mga may autism kag children with multiple disabilities.
KNOW THE STUDENTS
Agud matutukan ang mga kabataan, naghimo si Dr. Tarol sang curriculum nga gindisenyo santu sa pagkinahanglan sang mga estudyante.
Suno sa iya, ginatabasan niya sang curriculum (modified curriculum) ang mga kabataan agud magsantu sa ila kinahanglanon.
“Ang isa sa pamaagi nga ginhimo ko, first and foremost is to know them, my students. Dapat may ara gid ko sang pamaagi sa pagkilala gid mismo sa ila. Because awareness is very important. So I have this learners profile wherein I can see the background of my students. Ginatabasan ko sila sang ila curriculum… Modified curriculum… para magsantu sa ila kinahanglanon, mga special needs,” ang pahayag ni Dr. Tarol.
Aminado si Dr. Tarol nga kon gamiton niya ang curriculum sang DepEd para sa mga regular students, indi ini magsantu sa mga pagkinahanglan sang mga estudyante nga may multiple disabilities.
Panugyan ni Dr. Tarol sa mga ginikanan, indi gid pagpabay-an ang ila mga kabataan. Magluwas sa pagmotivate sa mga kabataan nga magtuon, importante suno sa iya nga mahibaluan kon ano ang nagatulod ukon ginahalinan sang impairment sang mga kabataan.
Ang awarding sang 2019 Metrobank Foundation Outstanding Filipinos hiwaton sa Setyembre 4 sa diin magabaton ang mga ini sang cash prize, golden medallion kag trophy.
