BACOLOD CITY –Nagpadangat na sang reklamo sa Department of Education (DepEd) paagi kay Schools Division Supt. Cynthia Dimavivas ang mga ginikanan sang duha ka 16 anyos nga mga Grade 10 students kontra sa ila maestro nga nag-aligar, ginhulid sila sa gina-istaran nga balay sa isa ka subdivision sa Barangay Granada, ciudad sang Bacolod.
Suno sa mga ginikanan, ulihi nalang nila nahibaluan nga ang ila kabataan ang nagatulog sa balay sang ila maestro, bangod ang rasun nila sa paglisensya, sa ila classmates sila nagatulog kay may obrahon nga assignment.
Wala man sila ginatandog sang ila maestro, magluwas lang nga ginahaluk halukan sa tion nga ini sila ang dungan nga magtulog, pahayag sang isa ka estudyante.
Natukiban man nila nga gintagaan sang kwarta ang mga estudyante para lang nga magpasugot nga maghulid.
Ginkadtuan mismo sang ginikanan ang eskwelahan sa diin nagatudlo ang maestro, sa Fr. Gratian Murray Integrated School (FGMIS) nga nabase sa Barangay Granada, apang ginadeny naman sini nga may malainsiya nga ginahimo sa mga estudyante.
Rasun niya nga gusto niya lang magbulig sa mga estudyante kon ngaa nga nagahatag ini sang kwarta, kag iya ini ginapakaon sa iya balay.
Iya man ginsiling, nga ang mga estudyante mismo ang nagakadto sa balay nga ang tag-iya, utod sang maestro bangod may balay man ini nga lain nga upod niya ang iya asawa.
Natingala naman ang isa ka ginikanan, nga iya man natukiban nga may ara sang pungpong sang yabe ang iya nga bata, nga yabi naman sang balay sang maestro.
Magluwas sa duha, may ara pa gid duha ka mga estudyante, nga amu man ang ginahimo sang maestro sa ila.
Suno naman kay Dimavivas, magaagi sa due process ang tanan, sa diin ila na napatawag ang mga magtimbang nga bahin angot naman sa amu nga akusasyon.
Ginpaidalom na sa medical examination ang mga estudyante, para gamiton nga balasihan sa pagpasaka sang kaso kreminal kontra sa maestro sa ulihi.
Nagpirma naman sang petition ang pila ka mga ginikanan para pahalinon sa FGMIS ang maestro, nga ginahinago lang ang iya pangalan. /dyHB-Bacolod
