Pagadian City – Sa PDEA Detention Cell na karon nakakwarantina ang mag-amahan human kining nadakpan sa hinugpong nga pwersa Philippine Drug Enforcement Agency (PDEA-IX), PDEA-Zamboanga del Sur, Provincial Drug Enforcement Unit -ZSPPO, Regional Drug Enforcement Unit 9, ug tropa sa kapulisan sa Margosatubig dihang gipahigayon nga Drug Buy-Bust Operation sa Parking Area sa Gaisano Mall, Barangay San Pedro, Pagadian City.
Mokabat sa 3.4 milyones nga kantidad sa shabu ang nakumpiska sa otoridad samtang moabot usab sa 1.2 million nga mark money ang nahipos gikan sa posisyon sa duha ka dinakpan.
Giila ang mga suspek nga si Macacuna Ali Gunting, 53 anyos ug ang anak nga si Bolkia Asum Gunting 27 anyos, pulos residente sa probinsya sa Lanao del Sur.
Sakay sa puti nga Mitsubishi Montero Sport nga nagtangag sa plaka numero NBV-9565 ang mga suspek ug gihimo ang transaksyon sa PDEA under cover agent nga nagpailang posseur buyer.
Dihang gitunol sa suspek sa item dali dayon kining gidasmagan sa Team PDEA Zamboanga del Sur ug ubang composite team nga pa sekretong naniid ug nagpahipi sa bisinidad sa parking area.
Kasong paglapas sa Akta Republika 9165 kon Comprehensive Dangerous Drug Act of 2002 ang giandam nga reklamo batok sa mga suspetsado.
(Photo courtesy: Pagadian News Icon)
