Balete, Aklan – May lead eon ro mga taga Balete PNP kon sin-o ro responsable sa natabong pagpamaril ko Sabado it gabii sa Sitio Mapait, Brgy. Aranas, Balete, Aklan.
Nakilaea ro mag-asawang biktima nga sanday Jorge Concepcion Valencia, 59-anyos ag Vilma Edayan Valencia, 47-anyos tanan residente it nasambitan nga lugar.
Base sa imbestigasyon it Balete PNP, nga rayang mag-asawa hay naghatod ko andang daywa ka kumpare sa Sitio Maeobog, Brgy. Calizo ag tag sanda ra nagapauli eon sakay it andang baroto sa suba may andang haagyan nga mga salingsing sa tubi, para nga indi masamad ro elise it andang baroto hay anda nga ginpaeong rong makina ag nagbugsay.
Maangan-anga nakabati sanda it eopok, gin flashlight raya ko misis kung sa siin uman eoman sanda nga binaril ag naigo ro mister sa tuo nga parte it buli ag nadaplisan man rong misis sa waea nga li-og.
Ko ulihi nagdisider sanda nga mag eompat sa baruto ag magpasalipod bangud nga sige gihapon kanda rong pagbaril dahil nakikita sanda bangud sa nagahayag nga flashlight.
Ginguyod nanda rong baruto maeapit sa may baeay sa kilid it suba ag idto sanda nagpangayo it bulig.
Insigida nga gindaea ro mga biktima sa St. Gabriel Medical Center agod mataw-an it nagakaigo nga pagbueong.
Samtang kahapon ginpaidaeom sa operasyon rong mister ag may mabuoe nga slug nga ginapatihan ana it 38 caliber.
Ginapanan-aw nga rason kara hay bangud sa dating away.
