Cauayan City, Isabela- Boluntaryong nagbalik loob sa pamahalaan ang dalawang mag-live in partner na miyembro ng New Peple’s Army (NPA).
Sumuko ang mga ito dakong alas 10:45 ng gabi noong Hunyo 04, 2020 sa tropa ng PNP Sto. Niño sa pangunguna ni P/Executive Master Sergeant Noel Balungaya.
Batay sa imbestigasyon ng pulisya, Enero 2018 nang mahikayat ng nagngangalang Ferdinand Bautista alyas Ka Simoy ang dalawa na itinago sa pangalang “Jay-ar”, 24 anyos, magsasaka, residente ng Sitio Aningag, Sta Felicitas, Sto. Niño, Cagayan at live-in partner na si “Aira”, 19 anyos, residente naman ng Rizal, Cagayan.
Nabatid na minsan nang nakipagbakbakan sa militar si “Jay-ar” na kadalasang inuutusan na taga kuha ng kanilang mga pagkain at gamot.
Walang katiyakan na patutunguhan at laging nagmamadali ang nag-udyok sa dalawa na umalis sa kilusan at magbalik loob na lamang sa gobyerno.
Nasa pangangalaga na ng PNP Sto. Niño ang dalawang sumuko para sa kaukulang dokumentasyon at disposisyon.
