Pagadian City – Naghimas na karun sa rihas sa Pagadian City Police Station lock-up cell ang mag-live in partner nga suspetsado sa pagpangilad gamit ang social media partikyular ang Facebook account.
Naaresto sa kapulisan ang mga akusado nga sila si Alniel Terez, 21 anyos ug ang kapuyo niini nga si Marisa Mintang pulos residente sa Poblacion sakop sa lungsod sa Mahayag ning probinsya sa Zamboanga del Sur.
Ang mga nadakpan nakakuha og P45 mil ka pesos gikan sa usa ka negosyante nga ilang gitanyagan sa hamis nga Toyota Avanza sa ubos kaayu nga presyo.
Gamit ang minugna lang nga pangalan sa Facebook nga “Alfie Cosares” nitanyag kini sa biktima nga si Bryan Calderon og sakyanan nga mokantidad sa P150,000.
Nadani sa malamaton nga mga pulong ang biktima nga negosyante nga taga Toledo City, Cebu og nikagat hangtud nga nakapadala og advance payment nga P15 mil ug subling nakapadala og P30 mil nga kantidad sa salapi.
Nakapamalandong ang biktima nga posibleng nailad siya busa nagpakitabang kini sa kapulisan nga miresulta sa pagkasikop sa mga responsable.
