Mag-nobyo patay, lima nasamaran sang nabungguan sang awto ang ila ginasakyan nga tricycle

77

BACOLOD CITY  –  Patay ang magnobyohanay samtang napilasan naman ang lima ka iban pa sang nabungguan sang isa ka awto nga Toyota Vios ang ginasakyan nga tricycle sang mga biktima pasado la una kaina sang kaagahon sa San Dionesio, Brgy. Granada diri sa ciudad sang  Bacolod.

 

Nakilala ang mga nagkalamatay nga sanday Jocelle Dimapula, 28 anyos ang edad kag ang iya nobyo nga si Roy Caballero, 29 anyos ang edad, pumuluyo sang Hda. Conchita sang amo man nga barangay.

 

Nasamaran naman ang driver sang tricycle nga si Joseph Lumangyao kag ang iban pa gid niya nga mga pasahero nga sanday Stephen Basoy, Adrian Mandaue, Elmer dela Torre kag James Salvador, tanan pumuluyo sang Brgy. Granada.

 

Samtang, nakilala naman ang driver sang awto nga amo si Renz John Gabitana, 19 anyos ang edad sang amo man nga barangay.

 

Ginpahayag nga bangod sang impact sang bunggo, napi-ud gid ang tricycle nga amo naman ang gintunaan sang kamatayon sang mag-nobyo.


Sa pagpangusisa, nagaguwa nga nakainom ang driver sang awto kag nagapadalagan sang 90kph sang natabo ang aksidente. /dyHB BACOLOD

 

 

 

 

Facebook Comments