HIMAMAYLAN CITY, NEGROS OCCIDENTAL – Padayon karon nga ginapangita sang mga utoridad ang isa ka lalaki nga suspek sa paglabo sa mag-utod nga menor de edad nga gintuyo niya nga himuslan kahapon sang aga sa ciudad sang Himamaylan.
Ang mga biktima isa ka 12 anyos kag 7 ka tuig nga bata nga babayi, residente sang Brgy. Buenavista, Himamaylan City.
Ginpahayag ni PO3 Rowena Jane Magan sang Himamaylan City Police Station, nga may mga las 10:30 kahapon sang aga, ang biktima kag ang iya 7 ka tuig nga manghod ang nabilin sa ila balay bangud nga ang ila mga ginikanan ang nag-obra sa kampo.
Posible ini nga kahigayunan ang nakita sang suspek gani iya ginsulod ang balay sang biktima kag gintuyo nga luguson ang 12-anyos.
Apang, nagbato ang bata gani ini ang ginlabo sang suspek gamit ang ispading kag naigo ini sa iya ulo, li-og kag kamot.
Naigu-an man sa kamot ang 7-anyos nga manghod sang biktima kag lunsay ini sila ginabulong karon sa Corazon Locsin Montelibano Memorial Regional Hospital.
Ara na sa maayo nga kahimtangan ang mag-utod sang ila ginbisita kahapon suno kay PO3 Magan. /dyHB BACOLOD
