Davao City – Dumot ang gilantaw nga motibo sa kapulisan hinungdan nga gipusil-patay sa mananggite ang usa ka mag-uuma alas-9:30 sa gabii niadtong adlaw’ng Martes sa Purok 4, Sitio Bob, Brgy. Barayong, Magsaysay, Davao del Sur.
Sa interbyu sa RMN Davao kang Magsaysay Municipal Police Station Officer-In-Charge P/Sr. Insp. Cris Ian Taghap nga nagpadayon pa gihapon ang ilang hot pursuit operation sa niikyas nga suspetsado nga si Eduardo dela Conception, 57-anyos, mananggite ug residente sa Prk. 1, Brgy. New Ilocos sa nasangpit nga probinsya.
Ang biktima giila nga si Emilio Maria Rosal, 59-anyos, mag-uuma, taga-Purok 4, Sitio Bob, Brgy. Barayong, Magsaysay, Davao del Sur.
Base sa imbestigasyon sa kapulisan, adunay panaglalis ang duruha una pa man nahitabo ang insidente apan naundang kini human nga niuwang kanila si Imbit Villapaz, tanod sa nasangpit nga barangay.
Human sa nahitabong bangi, niadto ang biktima sa payag sa usa ka Murillo Batawan Gubal ug nakipag istoryahanay pa kini didto.
Duha ka minuto ang nakalabay niabot ang suspek ug gamit ang usa ka shotgun gipusil niini ang biktima punterya sa tuo nga dughan niini hinungdan sa iyang kamatayon.
Narekober sa kapulisan ang usa ka homemade nga 12 gauge shotgun sa may sagbutan, 50 metros gikan sa balay sa suspek.
Sumala ni Taghap nga dumot ilang gituohang motibo nga nituklod sa suspek sa paghimo sa krimen nga posibleng nagsugod niadtong gikulata kini sa mga anak sa biktima niadtong Nobyembre 2 sa lugar sa suspek.
Kasong murder ang mamahimong ipasang-at batok sa suspetsado.
RadyoMaN Aimee Guinita
