Sergio Omeña Zamboanga del Norte – BLANGKO pa ang kapulisan sa Sergio Osmeña sa pagpusil-patay sa usa ka 40-anyos nga maguuma, mga alas 12:25 sa udto niadtong merkules didto sa Public Market, Barangay Nazareth, lungsod sa Sergio Osmena, lalawigan sa Zamboanga Del Norte.
Ang biktima nailhan nga si Romie Rumpas, 40 anyos, mag-uuma ug nagpuyo sa Barangay Bagumbayan sakop sa maong lungsod.
Samtang ang gitumbok na suspetsado naila nga si Joserey Baid Bongcawel, 44 anyos, minyo ug sumala pa sa kapolisan usa ka barangay kagawad sa Barangay San Isidro, Sergio Osmeña.
Sa inisyal nga imbestigasyon ni PO2 Reynante Bersales sa Sergio Osmeña Municipal Police Station nasayran nga nangumpra ang biktima sa may public market sa dapit.
Giingong kalit mibutho ang suspetsado sakay sa motorsiklo ug gipusil ang biktima gamit ang kalibre 45 nga pistola.
Daling nisibat ang suspetsado sakay sa single motor samtang naligo sa kaugalingong dugo ang biktima human naka-angkon ug tulo samad pinusilan isa diha sa ulo ug duha usab sa dughan nga maoy nakaigon sa dihadiha nga kamatayon.
Dali pa untang naglusad ug pursuit operation ang mga nirespondeng polis batok sa nisibat nga suspetsado nga paigon sa Barangay Marapong apan gumikan nagbaha niadtong higayona wala na nila maapsi ang maong suspetsado.
Sa karon ang sakop sa kapulisan sa Sergio Osmeña padayon pa sa ilang pagpangita sa suspek aron masuta kon unsa ang motibo niini sa pagpamusil patay ngadto sa biktima.
