Davao City – Giputlan og ulo sa iyang kainum ang usa ka mag-uuma alas-3:00 sa hapon kagahapong adlawa, Nobyembre 15, human kini wala magkasinabtanay atol sa ilang panag-inum nahitabo sa Sitio Mountainside, Brgy. Suawan, Marilog District.
Biktima naila nga si Ernesto Salay-ao, 45-anyos, pinaagi sab sa iyang asawa nga si Leonora Salay-ao, 27-anyos, parehong lumolupyo sa maong lugar samtang suspek naila nga si Renante Ediayo Andig, 27-anyos, ulitawo ug resirdente sa Prk. 13, Sitio Unapan, Brgy. Suawan.
Sa pakighinabi sa DXDC RMN Davao kang PO3 Dexter Cinco, imbestigador sa Marilog Police Station, gisaysay niini nga nag-inum og tuba ang mga naasoy niadtong tungora sulod sa balay sa biktima diin nilakaw matud pa ang asawa niini padulong sa sentro aron magpatambal.
Nakita sumala pa sa ilang silingan nga si Alona Damale ang panaglalis sa duha diin gikuha sa suspek ang lagaraw niini dayon giatake ang biktima tumong sa liog nga miresulta sa pagkaputol sa ulo ug pagkamatay niini.
Dugang ni PO3 Cinco nag-abot lang sila sa asawa sa biktima sa maong gipanghitaboan gani mao ra sab ang pagkasayod niini sanglit kinahanglan pa mobyahe og 6-7 kilometros gikan sa sentro paingon sa ilang panimalay.
Human sa insidente, daling gilusad ang hot pursuit operation nga miresulta sa pagkasikop sa suspek alas-5:00 sa hapon sa susamang adlaw diin dala pa niini ang gigamit nga lagaraw.
Karong adlawa gikatakdang mupatim-aw ang asawa sa biktima ngadto sa Marilog PNP ug ipasaka karong adlawa ang kasong murder batok sa suspetsado.
RadyoMaN Jason Amisola
