Ramon Magsaysay, Zamboanga del Sur – Nadakpan sa kapulisan sa Ramon Magsaysay ang usa ka pinangita sa balaod alas 10 kagahapon sa buntag didto sa Purok 6, Brgy. Poblacion, Ramon Magsaysay, Zamboanga del Sur.
Giila sa kapulisan ang dinakpan nga si FORTUNATO BUCOL LEGARA Jr. a.k.a. “FORTUNATO PUTALAN” 27 anyos, ulitawo, usa ka mag-uuma ug residente sa Purok 4, Brgy. Pasingcalan, Ramon Magsaysay.
Gidakop si Legara pinasikad sa gahum sa warrant of arrest alang sa kasong Attempted Murder, nga nakadokit sa Criminal Case No. 17-10,142 nga gipagawas ni HON. ANALYN F. RAMAS-COSTANILLA, Presiding Judge sa RTC, 9th Judicial Region, Branch 30, Aurora, Zamboanga del Sur.
120mil pesos ang girekomendang pyansa sa Korte bugti sa temporaryong kagawasan sa dinakpan.
Ang dinakpan ang kasamtangang gipriso karon sa Ramon Magsaysay lock-up cell samtang naghulat sa Commitment Order nga ibalhin sa Ramon Magsaysay Municipal Jail (BJMP).
