Davao City – Gitudlong responsable sa pagpatay sa 62 anyos ang usa ka 18 anyos nga babae ug uyab niini.
Sa report sa Sasa Police Station, giila ang gitudlong suspek nga si CAA Datuan Namla nga matud pa sakop sa Task Force Davao ug si Michelle Chai Forteza, residente sa Barangay Bolila, Malita, Davao Occidental nga sumala pa mga responsable sa pagpatay kang Eduardo Tan Sr., 62 anyos ug giingong ka live-in ni Forteza.
Kahinumduman nga nakaplagang wala nay kinabuhi niadtong Hunyo 29 ning tuiga ang 62 anyos nga lalaki sulod sa iyang panimalay sa may Sasa ning syudad sa Davao.
Samtang nasuta usab nga gikuha matud pa sa mga suspek ang sakyanan sa biktima nga karon nabawi na sa mga otoridad.
Balhug na sa prisohan ang mag-uyab human nadakpan sa otoridad sa Agdao, Davao City ug mag atubang karon og mga kaso tungod sa pagpatay ug pagkuha sa sakyanan sa nasangpit nga biktima.
RadyoMaN Renz Barbarona
