El consejal Mike Alavar juntoi consu familia y diila abogao ta estudia ahora cosa posible caso puede planta con cuantos miembros del Highway Patrol Group por el acto estos ya comete durante ya hace sila para con el vejiculo del su hermana y ya acusa que este un “hot car”. Desgustao man el consejal despues nohay este puede manda conversa con tres maga civilian quien tambien ya queda victima desde con el cuantos miembros del HPG porcausa ya sangga el otro consejal de mandar man cuento na cosejo durante el secion del Martes, si Alavar ay continua pelya el diila derecho y el posible el plantada de caso na corte con estos. Ya lleva tambien el asunto si Alavar na Policia Regional donde ya informa con ele que gende deve el HPG usa con el diila que se llama “auxiliary” o striker para hace el trabajo del un HPG pulis donde el mencionao auxiliary amo con quien ya alcansa si Alavar ta hace bulicat adentro del vejiculo del di suyu hermana. Asegun con Alavar deve ya este descansa el mal practica del cuantos miembros del HPG donde derepente ya lang estos ta hace para con el maga vejiculo y ta acusa que maga hot car este y ay busca estos el secret number adentro del vejiculo que asegun con el maga tienda ta bende vejiculo, nohay de ese clase de numero na masquin cosa clase de vejiculo.
