Dos maga moher ya sale arestao despues ya cuji conestos ta collecta P1,500 desde con el diila maga victima conquien sila ya promote trabaho na City Hall.
Con el maga suspechao ya conose como canda Julie Ann Francisco y Blasi, 35, de Kalayaan Subdivision, Luyahan, Pasonanca y Judith Bueno y Serra, 60, de Divisoria.
Asegun na report, el dos suspechao ya hace victima con el anac, subrina y bisinos del un kagawad de Divisoria donde ya pidi estos P1,500 cada un para asegun compra uniporme de City Hall el momento ay trabaha ya sila na gobierno local.
Pero asegun nohay sosede el diila promesas hasta mismo el kagawad junto con el tres victima ya anda na estacion del Divisoria para reporta el cosa ya pasa.
Maga pulis ya imbita primero con Bueno donde ya precura pa este nega hablando ya hace lang le pabor con Francisco.
Maga pulis ya sabe tiene pa otro maga 28 persona conquien ya hace victima el dos del mas temprano.
Ya conduci follow-up operation na Luyahan, Pasonanca donde ya resulta na aresto di Francisco.
