Pagahambalan sang League of Municipalities ukon LMP-Iloilo Chapter sa ila pagtililipon sa Hulyo 27 ang natuhoy sa pinakaulihi nga pagpatay kay Mayor Ferdinand Bote sang General Tinio, Nueva Ecija kag Mayor Antonio Halili sang Tanauan, Batangas.
Ilegal nga druga ang ginalantaw nga rason sang pagpatay kay Halili kag ginalantaw man kon may kaangtanan sa ilegal nga druga ang pagpatay kay Mayor Bote.
Sa ila pagtililipon, gin-imbitar sang LMP si PRO-6 Director Chief Supt. John Bulalacao.
Pagahambalan man nila ang mga programa angut sa kampanya kontra sa ginadilian nga druga , isyu sa narco-politicians kag iban pa.
Suno kay LMP-Iloilo Chapter President Mayor Jett Rojas, may mga alkalde sa probinsya sang Iloilo nga ginhingalanan sadto ni Pangulong Rodrigo Dutertenga ginapahayag lamitado sa ilegal nga druga apang wala sang kaso nga ginpasaka sa mga ini tubtub sa karon.
Ginpahayag ni Rojas nga sa politika, ginakabig nga high risks ang mga politiko kag kadam-an ang mga mabuot kag may kumpiyansa sa kaugalingon apang kon kaisa nagakadisgrasya ukon ginapapatay.
Sa probinsya sang Iloilo, wala nagakabalaka ang mga mayor sa ila seguridad kon sa diin kadam-an sa mga alkalde ang nagamaneho sang ila kaugalingon nga salakyan kag wala sila sang kaupod bangud matawhay ang politika sa probinsya.
