TACLOBAN CITY – Tikadto unta ha Balangiga, Eastern Samar an duha nga biktima para kumita han Balangiga bells kasangkulop han aga alas 7:20, Marso 24 pero naaksidente hira ha Brgy. Bolusao, Lawaan Eastern Samar.
Subay ha report han mga otoridad, ginkilala an mga biktima nga hira Christopher Trigo Estojero, 21 anyos, residente ha Sitio Caluogan, Brgy. San Jose Palo, Leyte; ngan hi Joevil Mark Cuba Elardo, 22 anyos, driver, usa nga estudyante ngan residente ha Zone 1 Brgy. Calougan, Palo, Leyte.
Ha inisyal nga imbistigasyon, waray makontrol han driver han single nga motor nga hi Joevil an paubos nga kalsada nga nagresulta han ira kaaksidente.
Tungod han kalaksi han ira padalagan, nabunggo an motorsiklo pati na an lawas han driver ha metal nga alad han kalsada.
Patay an driver nga hi Joevil samtang samaran naman an iya upod nga hi Christopher.
Upod han mga biktima an ira mga sangkay nga sakay gihapon han iba nga motorsiklo.
Abiso han mga otoridad, maghirot pagmaneho ngan diri magpalaksi pagpadalagan han ira ginsasakyan nga behikulo.
