Davao City – Nagdungan sa pagreklamo sa kwerpo sa kapulisan si alyas ‘Cherry’, 30 anyos, dalaga, nagpuyo sa J.V. Ferriols, ug alyas ‘Angel’, 24 anyos, dalaga, residente sa Teachers Village, Toril, Davao City.
Sa blotter sa Toril PNP, nagkasinabot ang duha nga magkita sa Toril Poblacion plaza alas 8:00 ang takna sa kagabhion aron estoryahan ang usa ka lalake nga pareho silang gipanguyaban.
Apan sa dihang nagkita na ang duha sa Toril plaza misangko ang panag-eyeball sa mainitong panaglalis nga miresulta sa panagbugno sa duruha.
Nagkadugo pa ang duha nga mipatala sa kapulisan tungod sa mga kinawrasan sa nagkadaiyang parte sa kalawasan ilabina gyud sa ilang mga nawong.
Gitambagan ang duha nga parehong mokuha og medical certificate ug padayong iduso ang ilang tagsa-tagsa ka reklamo sa barangay.
RadyoMaN Erin Lumosbog
